2009 ന് വിട!

2009 എന്ന വര്‍‌ഷം വിട വാങ്ങുകയാണ്. നമ്മുടെയൊക്കെ ജീവിതത്തിലെ കുറേയേറെ നേട്ടങ്ങള്‍‌ക്കും നഷ്ടങ്ങള്‍‌ക്കും സാക്ഷിയായ ഒരു വര്‍‌ഷം കൂടി ഇതാ പടിയിറങ്ങുകയാണ്, എങ്കിലും ഒരുപിടി പ്രതീക്ഷകളുമായി വീണ്ടും ഒരു പുതുവര്‍‌ഷം കൂടി നമ്മെ കാത്തു നില്‍‌ക്കുന്നൂ... എല്ലാം മറന്ന് നമുക്കു സ്വീകരിയ്ക്കാം, ഈ പുത്തന്‍ പ്രതീക്ഷകളുടെ പുതുവര്‍‌ഷത്തെ...

നമുക്ക് യാത്ര പറയാന്‍ സമയമായിരിയ്ക്കുന്നു...
2009ന്റെ തീരങ്ങളില്‍ നിന്നും…
പ്രതീക്ഷകളുടെ കൂടാരത്തിലേയ്ക്ക്...
സ്വപ്നങ്ങള്‍ പൂക്കൂന്ന പുതിയൊരു പുലരിയിലേയ്ക്ക്...
നന്മയും സ്നേഹവും വിരിയുന്ന താഴ്വാരത്തിലേയ്ക്ക്...
താളങ്ങള്‍ നഷ്ടപ്പെടാത്ത സൌഹൃദങ്ങളുടെ ലോകത്തേയ്ക്ക്...
ഓര്‍മകള്‍ കാത്തുസൂക്ഷിക്കുന്ന ഒരു നല്ല നാളെയുടെ തീരത്തിലേയ്ക്ക്...

യാത്രയാകുന്ന 2009ന്...
നന്ദി! നല്‍കിയ ഓര്‍‌മ്മകള്‍‌ക്ക്... സൌഹൃദങ്ങള്‍‌ക്ക്. സ്വപ്നങ്ങളുറങ്ങുന്ന തീരത്തിന് കൂട്ടായ് എന്നും നമ്മുടെ ഇന്നലെകള്‍ ഉണ്ടായിരിയ്ക്കട്ടെ... എല്ലാ ബൂലോക സുഹൃത്തുക്കള്‍ക്കും ഊഷ്മളമായ ക്രിസ്തുമസ്സ് - പുതുവത്സരാശംസകള്‍।!!!

വാല്‍‌ക്കഷ്ണം: കഴിഞ്ഞ വര്‍ഷം ഇട്ട ഈ പോസ്റ്റിനു ഒരു അനുബന്ധം കൂടി. 2010 എന്ന വര്‍‌ഷത്തെ ദിവസങ്ങള്‍‌ക്കനുസരിച്ച് ആഴ്ച ഏതെന്നറിയാന്‍ 400351362402 എന്ന നമ്പര്‍ ഓര്‍ത്തിരിയ്ക്കുക. എങ്ങനെ എന്നറിയാന്‍ ഈ പോസ്റ്റ് നോക്കുക.

രംഗന്‍‌തിട്ട പക്ഷി സങ്കേതത്തില്‍ നിന്ന്

1.

2.

3.

4.

5.

6.

7.

8.

9.

10.

ബാംഗ്ലൂര്‍ - മൈസൂര്‍ റൂട്ടില്‍ മൈസൂരിന് 18-20 കിലോമീറ്റര്‍ മുന്‍‌പാണ് രംഗന്‍‌തിട്ട സ്ഥിതി ചെയ്യുന്നത്. മാണ്ട്യ ജില്ലയില്‍ ശ്രീരംഗപട്ടണം ബസ് സ്റ്റാന്റില്‍ നിന്ന് ഏതാണ്ട് അഞ്ചെട്ട് കിലോമീറ്റര്‍ ഉള്ളിലായിട്ടാണ് രംഗന്‍‌തിട്ട പക്ഷി സങ്കേതം.

Open billed storks, Painted storks, Meal partners, Snowy egret, Greater Thick Knee, White Ibis, Stone Plougher, Spoonbills, River Terns, Patridge, Cormorants, Herons, Snake birds... ഇങ്ങനെ ഒട്ടനേകം തരത്തില്‍ പെട്ട പക്ഷികളുടെ ആവാസസ്ഥനമാണ് രംഗന്‍‌തിട്ടയിലെ ഈ പക്ഷി സങ്കേതം. മാത്രമല്ല ഇവയില്‍ പല പക്ഷികളുടേയും ആസ്ഥാനം സൈബീരിയ, ആസ്ട്രേലിയ, അമേരിക്ക തുടങ്ങിയ ദൂര ദേശങ്ങളാണെന്ന് അവര്‍ അവകാശപ്പെടുന്നു. അവിടെ ഇങ്ങനെ കുറേ ഇനത്തില്‍ പെട്ട പക്ഷികള്‍ ഉണ്ട് എങ്കിലും സന്ദര്‍ശകര്‍ക്ക് അടുത്ത് ചെന്ന് കാണാന്‍ നിവൃത്തിയില്ല. അവരുടെ ബോട്ടില്‍ ആ തടാകത്തിലൂടെയുള്ള യാത്രയ്ക്കിടയില്‍ എടുത്ത ചിത്രങ്ങളില്‍ ചിലതാണ് ഇവ. പലതും അടുത്തു കാണാന്‍ പറ്റാതിരുന്നതിനാലും ബോട്ട് നീങ്ങുന്നതിനിടയില്‍ എടുക്കേണ്ടി വന്നതിനാലും ചിത്രങ്ങള്‍ അത്ര വ്യക്തമല്ലാത്തതിനാല്‍ ഇവിടെ ചേര്‍ക്കുന്നില്ല.

മാത്രമല്ല, നിറയെ ചീങ്കണ്ണികള്‍ ഉള്ള തടാകമാണ് ഇത്. വലുതും ചെറുതുമായ ചീങ്കണ്ണികള്‍ പാറപ്പുറത്തും തീരങ്ങളിലും വിശ്രമിയ്ക്കാന്‍ കിടക്കുന്ന കാഴ്ചയും തടാകത്തിലൂടെയുള്ള യാത്രയ്ക്കിടയില്‍ സാധാരണമാണ്. പക്ഷേ, നമ്മുടെ ബോട്ട് അടുത്തെത്തുമ്പോഴേയ്ക്കും ഇവര്‍ മുങ്ങിക്കളയും. അതു കൊണ്ട് ഈ കാണുന്നവയല്ലാതെ വേറെ നല്ല ചിത്രങ്ങള്‍ എടുക്കാന്‍ സാ‍ധിച്ചില്ല.

******

ഏതാണ്ട് ഇതേ സമയത്ത് നമ്മുടെ സൂവേച്ചി നടത്തിയ മൈസൂര്‍ യാത്രയുടെ വിവരണം ഇവിടെ വായിയ്ക്കാം. :)

ഉത്തരം കിട്ടാത്ത ചോദ്യം?

ആശയക്കുഴപ്പത്തിലാക്കുന്ന ഒരു ചോദ്യമായാലോ?

ഒരു ഗ്രാമത്തില്‍ മൂന്നു സുഹൃത്തുക്കള്‍ ഉണ്ടായിരുന്നു. (നമ്മുടെ സൌകര്യത്തിന് അവര്‍ക്ക് രാമന്‍, സോമന്‍, ബാലന്‍‍ എന്നിങ്ങനെ പേരുകള്‍ ഇരിയ്ക്കട്ടെ). ഇവരില്‍ രാമന്‍ ജന്മനാ അന്ധനാണ്. രണ്ടാമനായ സോമന് ചെവി കേള്‍ക്കില്ല (എന്നു വച്ചാല്‍ പൊട്ടന്‍)‍. മൂന്നാമനായ ബാലനാകട്ടെ ഊമയുമാണ്.

മൂന്നു പേരും കച്ചവടം നടത്തി ഉപജീവനം കഴിയ്ക്കുന്നു. അങ്ങനെയിരിയ്ക്കെ ഒരു ദിവസം അന്ധനായ രാമന്റെ സമ്പാദ്യം മുഴുവനടങ്ങിയ പണക്കിഴി മോഷ്ടിച്ചു കൊണ്ട് നീചനായ സോമന്‍ സ്ഥലം വിടുന്നു. എന്നാല്‍ യാദൃശ്ചികമായി ബാലന്‍ ഈ കാഴ്ച കാണാനിടയാകുന്നു. സമീപത്തെങ്ങും മറ്റാരും ഇല്ലാതിരുന്നതിനാല്‍ മറ്റാരും തന്നെ രാമന്റെ സഹായത്തിനില്ല. ബാലന് എത്രയും വേഗം തന്റെ സുഹൃത്തിനെ സഹായിയ്ക്കണം എന്നുണ്ട്. ഊമയായ അയാള്‍ക്ക് എങ്ങനെ രാമനോട് അയാളുടെ പണക്കിഴി നഷ്ടമായ കാര്യം അറിയിയ്ക്കാന്‍ കഴിയും?

ഇതേ കഥ ചെറിയ വ്യത്യാസങ്ങളോടെ പലയിടത്തും കേട്ടിട്ടുണ്ട്. പക്ഷേ, എല്ലാത്തിന്റേയും കാതല്‍ ഒന്നു തന്നെയാണ്. ഊമയായ ഒരാള്‍ അന്ധനായ ഒരാളോട് ഒരു കാര്യം പറഞ്ഞു മനസ്സിലാക്കുന്നതെങ്ങനെ?

കൃത്യമായ ഒരുത്തരം ആരും പറഞ്ഞു കേട്ടിട്ടില്ല. ഒരുപാട് വഴികളിലൂടെ ഉത്തരത്തിലെത്താവുന്നതുമാണ്. പക്ഷേ മറ്റാരുടേയും സഹായമില്ലാതെ വേറെ ഉപകരണങ്ങള്‍ ഒന്നുമുപയോഗിയ്ക്കാതെ ഊമയായ ബാലന് അന്ധനായ രാമനെ സഹായിയ്ക്കാന്‍ കഴിയുമോ എന്നതാണ് ചോദ്യം!

ഈ ചോദ്യത്തിന് വരുന്ന ഉത്തരങ്ങള്‍ എങ്ങനെയൊക്കെ ആണെന്ന് നോക്കാം. എനിയ്ക്കും വ്യക്തമായ ഒരുത്തരം പറയാനില്ല. എങ്കിലും ഒരു വഴി കിട്ടിയിട്ടുണ്ട്, അത് ശരിയാണോ എന്നറിയില്ലെങ്കിലും. തല്‍ക്കാലം മറ്റുള്ളവരുടെ അഭിപ്രായങ്ങള്‍ അറിയട്ടെ.

പേരറിയാപ്പൂക്കള്‍

ഇത്തവണ ഊരും പേരുമൊന്നുമറിയാത്ത കുറച്ച് പൂക്കളുടെ ചിത്രങ്ങളാണ്.

1.

2.

3.

4.

5.

6.

7.

8.

9.

10.

ആര്‍ക്കെങ്കിലും ഇവയുടെ പേരറിയാമെങ്കില്‍ പറഞ്ഞു തരണേ...

ബൂലോകം കൂടുതല്‍ ജനശ്രദ്ധ നേടുന്നു

അപ്പു എന്ന പേരില്‍ ബൂലോകര്‍ക്ക് സുപരിചിതനായ ഷിബുച്ചായന്റെ ആദ്യാക്ഷരി എന്ന ബ്ലോഗ് "Converting Malayalis into Bloggers" എന്ന തലക്കെട്ടോടെ The New Indian Express ല്‍ Asha. P Nair എഴുതുന്ന Blogspot എന്ന കോളത്തില്‍ ഇന്ന് (ജനുവരി 20 ന്) അവര്‍ പരിചയപ്പെടുത്തുകയുണ്ടായി എന്ന വിവരം എല്ലാ ബൂലോകരേയും സസന്തോഷം അറിയിയ്ക്കട്ടെ. ഇനിയും വാര്‍ത്ത അറിഞ്ഞിട്ടില്ലാത്തവര്‍ക്കായി പേപ്പര്‍ കട്ടിങ്ങ് താഴെ ചേര്‍ക്കുന്നു.

തീര്‍ച്ചയായും മലയാളി ബ്ലോഗര്‍മാര്‍ക്ക് അഭിമാനിയ്ക്കാവുന്ന ഒരു കാര്യമാണ് ഇത് എന്ന് നിസ്സംശയം പറയാം. ഇന്ത്യന്‍ എക്സ്പ്രസ് പോലുള്ള ഒരു പ്രമുഖ ഇംഗ്ലീഷ് ദിനപ്പത്രത്തില്‍ ബ്ലോഗുകളെപ്പറ്റി ഒരു കോളം തുടങ്ങുന്നു എന്നത് തന്നെ അഭിമാനത്തിനിട നല്‍കുന്നു. ഇന്ത്യയിലെ ഭാഷാബ്ലോഗുകളില്‍ ഏറ്റവും ജനസഞ്ചാരമുള്ളതും, കണ്ടന്റ് ഉള്ളതുമായ ബ്ലോഗുകള്‍ പിറക്കുന്നത് ദൈവത്തിന്റെ സ്വന്തം നാട്ടുകാരുടെ മാതൃഭാഷയിലാണെന്നത് മലയാളത്തെ സ്നേഹിയ്ക്കുന്ന എതൊരു മലയാളിയേയും സന്തോഷിപ്പിയ്ക്കുന്നതാണ്.

മലയാളം ബ്ലോഗുകളെപ്പറ്റി ഒരു പഠനം നടത്തുന്നവര്‍ക്ക് അല്ലെങ്കില്‍ മലയാളം ബ്ലോഗിങ്ങിലേയ്ക്ക് ഇറങ്ങുന്നവര്‍ക്ക് എറ്റവുമധികം സഹായകമാകാവുന്ന ഒരു ചവിട്ടുപടിയാണ് ആദ്യാക്ഷരി എന്ന ബ്ലോഗ്. സ്വാഭാവികമായും ന്യൂ ഇന്ത്യന്‍ എക്സ്പ്രസ്സിന്റെ Blogspot എന്ന കോളത്തിന് ഹരിശ്രീ കുറിയ്ക്കുവാനായി ആദ്യാക്ഷരി തെരഞ്ഞെടുത്തത് അനുയോജ്യമായ തീരു‍മാനം തന്നെ.

ബൂലോകം പിറന്ന നാളുകള്‍ മുതല്‍‌ക്കു തന്നെ മലയാളം ബ്ലോഗിങ്ങിനെ സഹായിയ്ക്കുന്ന ഒട്ടനേകം ബ്ലോഗുകളും പോസ്റ്റുകളും ഉണ്ടായിട്ടുണ്ട് എങ്കിലും ഇവയില്‍ ഭൂരിഭാഗവും കമ്പ്യൂട്ടറും ഇന്റര്‍നെറ്റും കുറെയൊക്കെ ഉപയോഗിച്ച് പരിചിതമായവര്‍ക്കു മാത്രം എളുപ്പത്തില്‍ സ്വായത്തമാക്കാന്‍ പറ്റുന്ന ശൈലിയിലായിരുന്നു എഴുതപ്പെട്ടിരുന്നത്. ഇവിടെയാണ് ആദ്യാക്ഷരിയുടെ പ്രസക്തി. ഏതൊരു തുടക്കക്കാരനും മനസ്സിലാക്കാന്‍ പറ്റുന്നത്ര ലളിതമായി, പ്രത്യേകിച്ചും ആദ്യാക്ഷരിയുടെ ആമുഖത്തില്‍ പറയുന്നതുപോലെ കമ്പ്യൂട്ടര്‍ വിദ്യാഭ്യാസം ലഭിക്കാത്ത മുതിര്‍ന്നവരെ ഉദ്ദേശിച്ച്, കമ്പ്യുട്ടറില്‍ മലയാള ഭാഷയെ ആയാസരഹിതമായി കൈപ്പിടിയിലൊതുക്കാം എന്ന ആത്മവിശ്വാസം ആദ്യം മുതല്‍ക്കേ വായനക്കാരന് പകര്‍ന്നു കൊടുക്കാന്‍ കഴിയുന്ന രീതിയിലാണ് അപ്പുവേട്ടന്‍ ആദ്യാക്ഷരി അവതരിപ്പിയ്ക്കുന്നത്.

ആദ്യാക്ഷരിയിലേയ്ക്കു പോകാനായി ഇവിടെ ക്ലിക്ക് ചെയ്യുക

മലയാളം വായിയ്ക്കാനും അത്യാവശ്യം ടൈപ്പു ചെയ്യാനും മാത്രം അറിയാവുന്നവര്‍ക്കു പോലും മറ്റാരുടേയും സഹായമില്ലാതെ ഒരു ബ്ലോഗ് തുടങ്ങാന്‍ സഹായകമായ രീതിയില്‍ ഓരോ അദ്ധ്യായങ്ങളിലായി സ്ക്രീന്‍ ഷോട്ടുകളുടേയും ലിങ്കുകളുടേയും സഹായത്തോടെയാണ് ആദ്യാക്ഷരിയിലെ ഓരോ അദ്ധ്യായവും ചിട്ടപ്പെടുത്തിയിരിക്കുന്നത്. സംശയമുള്ളവര്‍ കമന്റുകളിലൂടെ അത് ചോദിച്ചാല്‍ താമസംവിനാ അത് പരിഹരിച്ചു കൊടുക്കുന്നതിനും ആദ്യാക്ഷരിയില്‍ സമയം കണ്ടെത്തുന്നുണ്ട്. ബ്ലോഗറില്‍ പുതിയതായി എത്തുന്ന ഫീച്ചറുകളെയും പരിചയപ്പെടുത്തിക്കൊണ്ട് ആദ്യാക്ഷരി അപ്ഡേറ്റ് ചെയ്യുന്നതിനും അപ്പുവേട്ടന്‍ ശ്രദ്ധിക്കുന്നു.

ഇവകൂടാതെ, ബൂലോകത്ത് നിലവില്‍ ലഭ്യമായ വേറെയും സഹായ ബ്ലോഗ് പോസ്റ്റുകളിലേക്കും, ബ്ലോഗ് സംബന്ധിയായ ടിപ്സുകള്‍ നല്‍കുന്ന ബ്ലോഗുകളിലേക്കും ഉള്ള ലിങ്കുകള്‍ ആദ്യാക്ഷരിയില്‍ നല്‍കിയിട്ടുണ്ട്. മലയാളഭാഷയുടെ ഉപയോഗം ബ്ലോഗില്‍ മാത്രം ഒതുക്കി നിര്‍ത്താതെ അത് മറ്റുമേഖലകളിലേക്കു കൂടി ഉപകാരപ്പെടുത്തുവാനായാണ് മലയാളം വിക്കിപീഡിയയില്‍ ലേഖനങ്ങള്‍ എഴുതുവാനുള്ള കാര്യങ്ങള്‍ വിശദമാക്കുന്ന സെക്ഷന്‍.


ഇന്ന് ലോകമൊട്ടാകെയായി ആയിരത്തില്‍പ്പരം മലയാളി ബ്ലോഗര്‍മാരുണ്ട് എന്നാണ് കണക്കുകള്‍ പറയുന്നത്. അവരെക്കൂടാതെ സ്വന്തമായി ബ്ലൊഗ് ഇല്ലാത്ത ബ്ലോഗ് വായനക്കാരും ഇ മെയില്‍ ഫോര്‍‌വേഡ്സ് ആയി മാത്രം ബ്ലോഗ് പോസ്റ്റുകള്‍ വായിയ്ക്കുന്ന മലയാളികളും ഉണ്ട്. കമ്പ്യൂട്ടറില്‍ മലയാളത്തിന്റെ ഉപയോഗം വര്‍ദ്ധിച്ചു വരുന്നു എന്നുസാരം.


ഇതു വരെ ബൂലോകത്തേയ്ക്ക് ഒന്നെത്തി നോക്കുക പോലും ചെയ്യാത്തവരാണെങ്കില്‍ കൂടിയും, ഇന്റര്‍നെറ്റില്‍ മലയാളം വായിക്കുവാനും, സ്വന്തമായി ബ്ലോഗു തുടങ്ങുവാനും ആഗ്രഹിയ്ക്കുന്ന ഏതൊരു മലയാളിയ്ക്കും ആദ്യാക്ഷരിയില്‍ നിന്നും ലഭിയ്ക്കുന്ന നിര്‍ദ്ദേശങ്ങളും അറിവുകളും വിലപ്പെട്ടതാണ്. പുതുതായി ബ്ലോഗ് തുടങ്ങുന്നവര്‍ക്കു മാത്രമല്ല, ബ്ലോഗിങ്ങിലെ സാങ്കേതികമായ പല കാര്യങ്ങളും അറിയാത്ത, നിലവിലുള്ള ബ്ലോഗേഴ്സിനും ആദ്യാക്ഷരി ഉപകാരംതന്നെ.

ചുരുക്കത്തില്‍ ഭൂലോകത്തു നിന്നും ബൂലോകത്തേയ്ക്കുള്ള ഒരു കിളിവാതിലാണ് ആദ്യാക്ഷരി. ഇനിയും ബൂലോകത്തിന്റെ ഈ ബാലവാടിയില്‍‍ നിന്നും ബ്ലോഗിങ്ങിന്റെ ബാലപാഠങ്ങള്‍ സ്വായത്തമാക്കി ഒരുപാടൊരുപാടു പേര്‍ ബൂലോകത്തേയ്ക്കു കടന്നു വരട്ടെ എന്നും അതു വഴി മലയാളം ബ്ലോഗിങ്ങ് ഇനിയുമിനിയും ഉയരങ്ങളിലേയ്ക്ക് പറക്കട്ടെ എന്നും ഇനിയുമൊരുപാട് നല്ല നല്ല എഴുത്തുകാര്‍ ബൂലോകത്ത് ഉണ്ടാകട്ടെ എന്നും നമുക്ക് പ്രത്യാശിയ്ക്കാം.

ആദ്യാക്ഷരി എന്ന ബ്ലോഗിലൂടെ മലയാളം ബ്ലോഗിങ്ങിന്റെ പ്രശസ്തി വര്‍ദ്ധിപ്പിച്ച അപ്പുവേട്ടനും ആദ്യാക്ഷരി എന്ന ബ്ലോഗിനും ആശംസകള്‍ നേരുന്നു. മലയാളം ബ്ലോഗിങ്ങ് ഇനിയും വളരട്ടെ!

ഈ ലിങ്കുകള്‍ കൂടി ശ്രദ്ധിയ്ക്കുക:

ഇന്‍ഡ്യന്‍ എക്സ്പ്രസ്സ് അപ്പുവിനെ പരിചയപ്പെടുത്തുന്നു: ഉപഭോക്താവ് [ഞാന്‍ അങ്കിള്‍]

അപ്പുവും ആദ്യാക്ഷരിയും... ഇന്ത്യന്‍ എക്സ്പ്രസ്സും: ചുറ്റുവട്ടം [അഗ്രജന്‍]

ആദ്യാക്ഷരിക്കും അപ്പുവിനും അഭിനന്ദനങ്ങള്‍: സ്പന്ദനങ്ങള് [അനില്‍‌ശ്രീ]

ആഴ്ച ഏതെന്നറിയാന്‍ ഒരെളുപ്പവഴി

2009 ഒക്ടോബര്‍ 2 വെള്ളിയാഴ്ചയാണോ?
പെട്ടെന്ന് നമ്മളോട് ഒരാള്‍ ഇങ്ങനെ ചോദിച്ചാല്‍ എന്തു ചെയ്യും? അടുത്ത് കലണ്ടറോ കമ്പ്യൂട്ടറോ മൊബൈലോ ഒന്നുമില്ലെങ്കിലും ഇത് രണ്ടു മിനിട്ടു കൊണ്ട് ഓര്‍ത്തെടുക്കാന്‍ ഒരു വഴിയുണ്ട്. [ഇത് ഞാന്‍ കണ്ടു പിടിച്ചതൊന്നും അല്ല കേട്ടോ. പലര്‍ക്കും അറിയാവുന്ന വഴി ആയിരിയ്ക്കും ഇത്. എങ്കിലും കേട്ടിട്ടില്ലാത്തവര്‍ക്കു വേണ്ടി ഇത് ഇവിടെ പങ്കു വയ്ക്കുന്നു]

ഈ ഐഡീയ ഒന്നു ശ്രമിച്ചു നോക്കൂ...

ആദ്യമായി ഓരോ മാസത്തിനും താഴെ കൊടുത്തിരിയ്ക്കുന്ന നമ്പറുകള്‍ ഓര്‍ത്തു വയ്ക്കുക.

ജനുവരി > 3
ഫെബ്രുവരി > -1 (അല്ലെങ്കില്‍ 6)
മാര്‍ച്ച് > -1 (അല്ലെങ്കില്‍ 6)
ഏപ്രില്‍ > 2
മെയ് > 4
ജൂണ്‍ > 0
ജൂലൈ > 2
ആഗസ്ത് > 5
സെപ്തംബര്‍ > 1
ഒക്ടോബര്‍ > 3
നവംബര്‍ > -1 (അല്ലെങ്കില്‍ 6)
ഡിസംബര്‍ > 1

അടുത്തതായി, നമുക്ക് ഏതു മാസത്തിലെ ദിവസമാണോ കണക്കാക്കേണ്ടത്, ആ മാസത്തിന് അനുബന്ധമായി കൊടുത്തിരിയ്ക്കുന്ന അക്കം ആ തീയ്യതിയോടു കൂടി കൂട്ടുക. എന്നിട്ട് കിട്ടുന്ന തുകയെ 7 കൊണ്ട് ഹരിയ്ക്കുക. ഇനി ഹരണഫലം ഒഴിവാ‍ക്കി ശിഷ്ടമായി കിട്ടുന്ന അക്കങ്ങളെ മാത്രം പരിഗണിയ്ക്കുക. ആ അക്കങ്ങളില്‍ നിന്ന് നമുക്ക് അറിയേണ്ട തീയ്യതി ഏതു ദിവസമായിരിയ്ക്കുമന്ന് മനസ്സിലാക്കാം.

ശിഷ്ടം 0 ആണെങ്കില്‍ - ഞായര്‍
ശിഷ്ടം 1 ആണെങ്കില്‍ - തിങ്കള്‍
ശിഷ്ടം 2 ആണെങ്കില്‍ - ചൊവ്വ
ശിഷ്ടം 3 ആണെങ്കില്‍ - ബുധന്‍
ശിഷ്ടം 4 ആണെങ്കില്‍ - വ്യാഴം
ശിഷ്ടം 5 ആണെങ്കില്‍ - വെള്ളി
ശിഷ്ടം 6 ആണെങ്കില്‍ - ശനി

ഉദാ: നമുക്ക് കണ്ടു പിടിയ്ക്കേണ്ടത് 2009 ഡിസംബര്‍ 25 ഏതു ദിവസം ആയിരിയ്ക്കും എന്നാണെന്ന് കരുതുക. അപ്പോള്‍ 25 ന്റെ കൂടെ ഡിസംബറിനോട് അനുബന്ധമായി മുകളില്‍ കൊടുത്തിരിയ്ക്കുന്ന “1” കൂട്ടുക. അതായത് 25 + 1 = 26. ഇനി 26 നെ 7 കൊണ്ട് ഹരിയ്ക്കുക. 26 നെ 7 കൊണ്ട് ഹരിയ്ക്കുമ്പോള്‍ ഹരണഫലമായി 3 ഉം ശിഷ്ടമായി 5 ഉം ലഭിയ്ക്കും. ഇനി മേല്‍പ്പറഞ്ഞ പ്രകാരം 5 എന്നത് വെള്ളിയാഴ്ച ആണെന്നു മനസ്സിലാക്കാം. അതായത് 2009 ഡിസംബര്‍ 25 എന്നത് ഒരു വെള്ളിയാഴ്ച ആയിരിയ്ക്കും.

എല്ലാവര്‍ക്കും ഒരു നല്ല പുതുവര്‍ഷം ആശംസിയ്ക്കുന്നു...

----------------------------------------------------------------------------------

വാല്‍‌ക്കഷ്ണം: പത്തക്കമുള്ള മൊബൈല്‍ നമ്പര്‍ ഓര്‍ത്തിരിയ്ക്കാമെങ്കില്‍ പന്ത്രണ്ടക്കമുള്ള 2009 ലെ കലണ്ടര്‍ ഓര്‍ത്തു കൂടേ?

366240 251361 എന്ന് ഓര്‍ത്താല്‍ പോരേ? ;)